Bugun, 4 dekabr kuni Oltinsoy tumani hokimligi, tuman Mahalla va oilani qo‘llab-quvvatlash bo‘limi tashabbusi bilan tuman tibbiyot birlashmasi, tuman xalq ta’limi bo‘limi, tuman soliq davlat inspeksiyasi, tuman obodonlashtirish boshqarmasi va jismoniy tarbiya va sport bo‘limi, “Oltinsoytumangaz”, tuman elektr tarmoqlari korxonasi, Oltinsoy tuman qishloq xo‘jaligi bo‘limi, tuman madaniyat bo‘limi, tuman hayvonlar tashhisi va oziq-ovqat mahsulotlari xavfsizligi davlat markazi, tuman veterinariya bo‘limi rahbarlari va xodimlar ishtirokida «Sog‘lom hayot uchun 5000 qadam» shiori ostida ommaviy yurish marafoni o‘tkazildi.Marafonda ommaviy axborot vositalari xodimlari ham ishtirok etdi.
Ma’lumki yurtimizda aholi salomatligi muhofazasi birlamchi o‘rinda turadi. Qolaversa, so‘nggi yillarda bu masalada asosiy e’tibor kasalliklar bilan kurashishga emas, aholining tibbiy va sanitar-gigienik madaniyati darajasini oshirish hamda tizimli profilaktikaga qaratilmoqda.
Muhtaram Prezidentimiz ta’kidlaganidek, sog‘lom hayot tarzini shakllantirish, odamlarni ko‘proq doriga emas, balki to‘g‘ri ovqatlanishga, sportga o‘rgatish lozim. Davlatimiz rahbarining har kim o‘z salomatligi uchun hech bo‘lmaganda kuniga 5 ming qadam piyoda yurishi borasida bildirgan tavsiyalariga amal qilib oltinsoylik yoshu-keksalar birdek sog‘lom hayot tarzini targ‘ib etayotgan marafonlarda jismoniy faollik ko‘rsatayotgani barchamizni quvontiradi.
Bugun ham oltinsoyliklar erta tongni “Sog‘lom hayot uchun 5000 qadam bosing” shiori ostida boshlashdi. Tuman markazidagi “Okean” to‘yxonasidan to Toshkent-Denov katta yo‘l traktigacha bo‘lgan masofani bosib o‘tgan tuman faollari, xodimlar, nuroniy otaxonlar marafondan so‘ng avtobuslarga o‘tirib, tumanning “Qurama-1” mahallasi hududidagi “Chori Yormat” fermer xo‘jaligi dalasi tomon yo‘lga tushishdi. Ular bu yerda tuman obodonlashtirish boshqarmasi xodimlari bilan birga “Yashil makon” umummilliy loyihasi doirasida 1 gektar maydonga 500 tupdan ziyod mevali daraxt ko‘chatlarini o‘tqazishdi.
Ayni paytda tumandagi mahallalar, korxona va tashkilotlar hovlilari, yon-atroflarga, yo‘l va ko‘cha yoqalariga mevali, manzarali daraxt ko‘chatlari va butalar ekish ishlari qizg‘in olib borilmoqda.
© Oltinsoy tumani hokimligi veb-saytlari 2024