Assalomu alaykum, qadrli ustoz va murabbiylar!

Avvalambor Sizlarni 1 oktabr — O‘qituvchi va murabbiylar kuni umumxalq  bayrami bilan chin qalbdan samimiy muborakbod etaman.

Ulug‘ shoir va mutafakkir bobomiz Alisher Navoiy hazratlari «Haq yo‘lida kim senga bir harf o‘qitmish ranj ila, aylamak bo‘lmas ado oning haqin ming ganj ila», deganlarida siz kabi fidoyi ustozlarning sharafli mehnatingizni nazarda tutganligiga ishonchim komil.

Darhaqiqat, ustoz deganda har qaysi inson ko‘ngliga chuqur hurmat-ehtirom va cheksiz minnatdorlik tuyg‘ulari, shu bilan birga hech qanday boylik bilan o‘lchab va ado qilib bo‘lmaydigan qarzdorlik hissi paydo bo‘ladi. Ustozlarimiz o‘giti va keksalarimiz pand-nasihatlariga amal qilib borsak, aslo kam bo‘lmaymiz. Bu bilan ustoz va murabbiylarimiz oldidagi ilk  burchimizni ado etgan bo‘lamiz.

Xalqimiz ustozlarni e’zozlab “Ustozning umri  mangu, chunki shogirdlar umri unga ulanadi” deydi. Ha, juda ham to‘g‘ri fikr. Muallim-ustoz shunday mo‘tabar zotki, uning nomi ham, umri ham hamisha boqiydir.

Muhtaram Prezidentimiz Shavkat Mirziyoev tashabbusi bilan yurtimizda o‘qituvchi obro‘sini yuksaltirish, izzatini o‘z o‘rniga qo‘yish, ta’lim maskanlarini obod etish borasidagi tub o‘zgarishlar amalga oshirildi. “Yangi O‘zbekiston maktab ostonasidan boshlanadi”, degan ezgu da’vat o‘rtaga tashlandi. Bundan nafaqat o‘qituvchi va murabbiylar, balki barcha xalqimiz, keksayu yosh birdek mamnun bo‘ldi.

Aziz ustozlar, murabbiylar!

Bugungi kunda Oltinsoy tumanida ham fidoyi, halol, o‘z vazifasini vijdonan ado etib kelayotgan ustoz-murabbiylarimiz ko‘plab topiladi. Biz ular bilan haqli ravishda faxrlanamiz.

Quyidagi ilg‘or ustoz- murabbiylar — 13- ayrim fanlar chuqur o‘qitiladigan maktabning boshlang‘ich sinf o‘qituvchisi Yulduz Hasanova, 63-maktabdan matematika fani o‘qituvchisi Bobomurod Aliev, 47-maktabdan ingliz tili fani o‘qituvchisi Bakir Murodov, 12-maktabdan ona tili va adabiyoti fani o‘qituvchisi Turg‘un Jo‘raev, 7-maktabdan fizika fani o‘qituvchisi Azim Meliqulovlar shular jumlasidandir.

Fursatdan foydalanib, yosh avlodga ta’lim-tarbiya berishda kamarbasta bo‘lib, mehnat qilayotgan barcha ustozlarimizga o‘zimning samimiy minnatdorchiligimni bildiraman.

Siz azizlarni, tumanimiz ta’lim sohasi fidoyilarini, barcha ustoz va murabbiylarni 1 oktabr — O‘qituvchi va murabbiylar kuni umumxalq bayrami bilan chin qalbimdan tabriklayman.

Sizlarga sermazmun umr, sog‘lik va omonlik tilayman. Barkamol avlodni tarbiyalab, voyaga yetkazishdek muqaddas va sharafli ishlaringizda muvaffaqiyatlar hamisha yor bo‘lishini tilayman.

                Bayramingiz muborak bo‘lsin!